Google Another Angle of Love
                                                                 Back to Homepage                   
                                                                            
                                                                        Chapter 1    

            MALAYO na ang kinaroroonan ni Aloha sa dagat mula sa dalampasigan habang patuloy ang pagtagas ng mga luha sa mga mata niya. 
           "Miss ano ka ba huwag kang magpapakamatay. Kung ano man iyang problema mo baka matulungan pa kita!" sigaw ng lalake habang hawak-hawak siya sa beywang sa malalim na dagat sa isang magandang beach resort.

          "Bitawan mo ako, pabayaan mo nga ako!" nakatalikod at pasigaw na sagot niya habang nagpupumiglas sa mahigpit na pagkakahawak nito.

          "Ba't ka ba magpapakamatay, pera ba ha?" malakas na tanong nito. "Kung gusto mo pauutangin kita!"

          "Pag hindi mo ako binitawan, iyang buhay mo ang uutangin ko, sira ulo ka!" muling sigaw niya. "Sino bang magpapakamatay ha, hoy okey ka lang!"

          Biglang natigilan ang nagpapakabayaning lalaking ito at dahan-dahang bumitaw sa balengkenetan niyang beywang. "Ha hindi ka pala magpapakamatay akala ko kasi eh..." nahihiyang banggit nito sabay kamot sa ulo.

          "Opo, hindi po ako magpapakamatay sir! Ang laki ng problema mo tsong!" bwisit na bwisit na sagot niya sabay talikod at harap sa lalakeng sumaklolo sa kanya. 

          "Pasensya na Miss ikaw naman kasi eh..." kakamot-kamot na pahayag nito habang nakatingin sa magandang mukha niya.

          "Eywan ko sa iyo, diyan ka na nga!" Sabay lakad pabalik sa may dalampasigan pero mabilis ding natigilan at nangiti ng kunti.